الغلاف

Charbel Baini

Domoo3ee

My Tears
Cover by Randa Baini

الى روح ابنة عمتي إيفا اليموني

ـ1ـ

من يوم كنت زْغيرْ

حبّيتْ صوتا كتيرْ

كانت تغنّيلي:

"يمّا القمر ع البابْ"

وتضحك مقابيلي

ويزهّر العنّاب

وحسّ بدّي طيرْ

متل العصافيرْ

ـ2ـ

كنت شوفا أختْ

وما كانْ عندي أختْ

وفي يوم.. لفّو غيابْ

غمّضت عيني ونمتْ

وصرخت لمّن قمتْ:

وين إيفا وين؟

وين اللي كانت عيدْ

ملوى القلب والعين؟

ـ سافرت لبعيدْ

عَ بلاد خلف البحرْ

حسّيت إنّي دختْ

وغرقت بالتنهيدْ 

لمّن بليلة قهرْ

ودّع سمانا البدرْ.

ـ3ـ

وسافرتْ بعد سنينْ

وشفت إيفا أم

حدّا ولاد زْغار

متل الزهر حلوين

وجرجوره ربّ الدارْ

بيمشي بعُروقو دمّ

طاهر.. نقي.. جبّارْ

فرّح جبل صنين

ـ4ـ

وإيفا الـ حنانا جبالْ

بالحب غمرتني

قالت: يا ابن الخالْ

جوعان: طعمتني

وصرت أتذكّرْ

هاك الصبيّه الـ خدّها مرمر

وضحكتا سكّر

بعدا متل ما كانتْ وأكترْ

بتشرّف الهجران

وبرسا ورشدبين

وأرزه بجبل لبنانْ

ـ5ـ

يا هجر قللي مين

ما جنّ وتحسّر

ع أم قديسه

ركعت بالكنيسه

إسمْها إيفا.. 

إيفا اليموني

ربّ السما شافا

الطلبات ع شفافا

بإيام شهر الصومْ

قللا: يا بنتي اليوم

حدّي أنا.. كوني

**

العمة أم: عمتي جورجيت

إلى روح عمتي جورجيت بعيني

ـ1ـ

يا عمتي جورجيت شو بقلّك

مهما بعدتي.. بقلبنا محلّك

سركيس، باخوس، بولس وبطرس

إخوه.. اشتاقوا كتير لمطلّك

خرستين ستّي عيلتا بتحرس

ودّت أبوكي ع السما يدلّك

ومادلين حُبّا زهور عم تغرس

وكرمه الحنونه بتعشقك كلّك

وبطرس، رفيق الدرب، عم يدرس 

كيف بدّو يزيّنك بالحُبّ

وإنتي حنان وحبّ ع حلّك

ـ2ـ

قلوبنا بتبكي على غيابك 

بملبون وسيدني كتار أحبابك

العمه.. ع طول منعتبرها أم 

نحنا ولادك.. وسّعي بوابك

خوسيهْ.. يللي سنين فيكي اهتمّ

للعيد شفتو محضّر تيابك

العمّه.. ع طول عيالها بتلم

لمّت عيالك دمعة مصابك

الدم البعيني هون.. أشرف دم

لوّن بحبّو كمشة ترابك

ـ3ـ

يا عمتي جورجيت باقي هون

عمّه وحيده منعبدا عباده

راحيل.. قوليلو لإله الكون 

يطوّل بـ عمرا شوي بزياده

قلبا احترق ع البنت من شهرين

واليوم.. موتك نار بالعينين

بيكفي حزن.. بـ جاه هالعيدين

خصوصي ميلاد السيّد الفادي

ميلاد 2013

ابو الياس: عمي بولس

إلى روح عمّي بولس بعيني الطاهرة

ـ1ـ

خسرناك يا بو الياس.. يا عمّي

خسرناك يا نبع المحبّه والحنان

يا بولس بعيني.. النار بِـ دمّي

والدمع من كتر الدمع يئسان

هَمّي كبير.. وزدت ع هَمّي

مات آخر عَمّ... بالهجران

سلّم عَ بيّي وقلّها لإمّي

أيتام صرنا.. مات بي الكل

وبكيت الأرزه بِـ جبل لبنان

ـ2ـ

قالوا: كِبِر.. وإنت بْعينَيْنا كْبير

ناطور كنت.. بْتِحْرُس نْواطير

تِسْعين شو تِسْعين يا بو الياس

عَ مْحَبّتَك.. والله قليله كْتير

وْلاد عمّي تاكيين الراس

وعيلة بعيني لفّها التعتير

محبوب كنت.. سآل كل الناس

عم يحلُف بْإسمك كْبير زْغير

يا شمعة الْـ ما بتنطفي بقدّاس

يا صورة الـ مُش لازما تِبْخير

يا سْراج مِضوي بْدَير مار الياس

يا جار عدرا اشْتاقت التنوير

بمجدليا اليوم دقّوا جْراس

وصار الحزن ع بيادرا قناطير 

ـ3ـ

كيف بدّي ودّعَك قللّي

وكِنّا بْدينَيْنا صوتَك نَملِّي

الـ عَمّ اللي متلك صعب إنّو يْموت

تارك حَنانو بْقلبنا غَلِّه

هِنيّال قلبو فيك هالتابوتْ

هوّي الـ ربِِح ونحنا اللي خْسرناك

وْلازم نعيش العمر عَ ذكراك

وكل ما ذَكرنا إسمَك.. نْصَلّي

**

الغصّه عَم تقْوى يا أمّي: بترونله بعيني

شربل بعيني يناجي أمّه المرحومة بترونلّه

ـ1ـ

الغصّه عَم تقْوى يا أمّي

هرمت جسمي وحرقت دمّي

موتِك خلاّني إتعذّبْ

إقعُد إتْسلّى بِـ هَمّي

من دونِك.. هالقلب مكهربْ

والضحكه يبست عَ تمّي

تغرّبت وراجع إتغرَّبْ

حضنك كان بلادي.. وصرت

إحلم تا تضُمّيني ضمّه

ـ2ـ

موتك يَمّي.. بيحرق حَرْق

أقوى من طعنات البرق

تا قلّك شو عملتي فيّي

حكيي مش رح يعمل فرق

تركتيني صفحه منسيّه

بكتاب مشلّع بالشرق

بفيق.. الدمعات بْعينيي

وبغفى وراسِك تاكي عليي

والدمّ منشَّف بالعرق

ـ3ـ

شو بدّي قلِّك يا عيُوني

إنتي بقلبي وين ما تكوني

كنتي الإلهام بأشعاري

الْـ دوّخ أرجاء المسكونه

كنتي الفرحه الـ غمرت داري

الريشه العم ترسملي فنوني

غيابِك قطّعلي أوتاري

ختيَرني.. خلاني ضايِعْ

بْغُربِه.. قهّاره ومجنونه

ـ4ـ

بترونلّه.. الإسم كبيرْ

أرزه.. هَالْـ بترونلَّه

ع جْريْها نخّ التقدير

وشهدتلا الدنيي كلاّ

أُم.. ومتلا ما بيصير

بالقداسه بتتحلّى

زرعت عينيها نواطير

وتا تحرس عيلتها كتير

هديت عيلتها لألله

ملاك اسما: ماري بعيني

إلى روح ابنة عمتي الحبيبة ماري بعيني

ـ1ـ 

لا تزعلوا.. لو فارق الدنيي مَلاك

مْلاك السّما بيروح وبيرجع

المؤمن بـ ربّو.. صعب يطويه الهلاك      

بتضل روحو بالسّما تلمَع

ـ2ـ

من بعيد جايي.. ودمعتي قنطار

تا ودّع اللي حارقَه قلبي

زهره.. إذا بتخبّر الأزهار

انوجدت لَ عرسا بس.. يا ربّي

ـ3ـ

هيك العرس بيكون!؟ مش معقول

نطرنا الفرح.. مين حوّلو لْمأتم

ماري بعيني الـ سوسحت العقول

صفّى المسيح بطلّتا يحلم

ـ4ـ

ع اسم مريم.. سمّتا الام الحنون

راحيل عم تبكي عروستها

وطلّت العدرا.. الدمع جُوّات العيون    

ع سميّتا.. ونخّت تا باستها

ـ5ـ

بِكْيِت عْليها أرزة بْلادي 

وبِكْيِت الجاره.. ودقّت جراسا

هاك الْكنيسه الـ شبعتْ عباده 

بِـ مجدليا.. منحني راسا

ـ6ـ

 عشنا سوا متل الأخت والخي

ومحروم صوت الأخت يا دلّي

مهما انطفى من العمر صيتا حي

وكرمال عينا عْيال بتصلّي

ـ7ـ

هنيّال قلبا الكل حبّوها 

وما في قلب ما استقبلا بقلبو

ضبّت شنطها وراحت لبُوها 

ترجّت يسوع يعيّشا بْقربو

ـ8ـ

من بعد موتِك.. يا عروس زغيّرَه

صارت حياة عيالنا متغيَّرَه

القبر اللي إنتي فيه رح يبقى مزار

مهما برمنا بهالدني.. عيالك كْتار

ودروبنا رح تنتهي بهالمقبرَه

30/7/2013

الى روح الطفلة خرستين

الى روح الطفلة خرستين

يا ملاكي البالسما.. صلّي

من دموع شاعر بحر بتملّي

سمعنا يسوع بينده خرستين

عرفنا السّما رح تربح الغلِّه

يسوع حبّك.. غيّر التكوين

صرتي الشمس.. يا شمسنا طلّي

عمرك ع وج الارض ست سنين

علينا العمر ما لازم تغلّي

إمّك.. الاخوه.. كتير مشتاقين

مهما بعدتي ومرقت الإيام

حلفنا بقلب قلوبنا تضلّي

البطل نايم: عمي باخوس بعيني

استشهد عمّي باخوس بعيني في 14 كانون الثاني 1976. وقد لحن هذه الأغنية وغنّاها الفنان سمير بدر.

ـ1ـ

قالُوا: الْبَطَلْ نايِمْ

بِالسَّاحَه، وْمُشْ غافِي

وْبَيْرَقْ عِزُّو دَايِمْ

وْإِسْمُو عَلَى شْفافِي

ـ2ـ

يا باخُوس الِبْعَيْنِي

رَحْ حِطَّكْ بِـ عَيْنِي

وْعَمِّرْلَك جْنَيْنِه

عَ بَابَا صفْصَافِه

ـ3ـ

نِحْنا يا بُو الْهِمِّه

حْفِظْناها هَـ الْكِلْمِه

قِلْتِلاَّ: يا أُمِّي

جايِيكي.. لا تْخافِي

ـ4ـ

عَمِّي.. يا إِبْن السِّتِّينْ

عِنْد الْحَزِّه عِشْرِينْ

مِنْ صَوْتَكْ الِمْهاجْمِينْ

جَرْفِتْهُنْ جرَّافِه

**

متل النبي أيوب: عفيفة حرب

إلى روح الغالية عفيفة حرب

يا عَفيفِه.. الطُّهْر قدّامِك رَكَعْ

إِنْتِي الطّهاره والمحبِّه والْحَنانْ

كِنْتِي كَريمِه كْتيرْ.. حتّى عَ الوَجَعْ

مِتْل النََبِي أَيّوب جيتيِ بْهَـ الزَّمانْ

سُعاد أخْتِك قَلبْها الطاهر دَمَعْ

انْقَصّوا جْناحا الْيَوْم.. وِانْهَزّ الكيانْ

وْطَلْبِتْ بِأَعلى صَوْت طَلْبِه بْتِنْسَمَعْ

صَلّوا لْعَفِيفِه.. وْغَصّت.. وغَصّ المكانْ

إسْمِك.. مِتِل بَيْرَق بِغُرْبِتْنا ارْتَفَعْ

أَرْزِه عَظِيمه بارَكا لُبْنان

**

بطل من لبنان: أنطوان الياس سليمان

استشهد الشاب أنطوان الياس سليمان في 12 تموز 1976. وقد لحن هذه الأغنية وغنّاها الفنان سمير بدر.

ـ1ـ

حَدّ الأَرْزِه الْمُخْضَرَّه

رَكْعِتْ هَـ الْبِنْت السَّمْرَا

وْقالِتْ: دَخْلَكْ يا رَبِّي

هَـ الشَّبّ الْـ بَعْدُو بْقَلْبِي

رَحْ يِخْوِتْنِي بِالْمَرَّه

ـ2ـ

هُوِّي إِسْمُو وَيْن ما كانْ

بْحَيْثُو بَطَلْ مِنْ لُبْنانْ

قَلْلاَّ: شُو إِسْمُو؟.. قالِتْ:

أَنْطُون الْياس سْلَيْمانْ

وْنِتْفِه نِتْفِه مِتل الْكِذْب

صَارُوا خْدُودَا مِحْمَرَّه

ـ3ـ

عُمْرُو؟.. شُو الْوَرْد.. وْشُو الْفُلّ!

اسْتَشْهَدْ حَتَّى وَطَنُو يْضَلّ

وْصَفَّى شَمْس يْضَوِّي الْكِلّ

وْذِكْرَى مِنْ أَحْلى ذِكْرَى

وْنِتْفِه نِتْفِه مِتل الْكِذْب

صَارُوا خْدُودَا مِحْمَرَّه

**

أحلى عريس: ميشال حنا المقدسي

استشهد الشاب ميشال حنا المقدسي في 22 آذار 1976. وقد لحن هذه الأغنية وغنّاها الفنان سمير بدر.

ـ1ـ

مِيشالْ حَنَّا الْمِقْدِسي

يا أَلفْ كِلْمِه مْقَدّسِه

لَمَّا تاريخُو بْيِنْكَتَبْ

يا بِنْت تَوَّجْها الأَدَبْ:

طَرْحِةْ الْمَجْد الْبِسِي

ـ2ـ

أَحْلى عَريس بْهَـ الدِّنِي

عْيُونُو.. الصَّبايا مْجَنّنِه

بْتِمْرُق سِنِه وْخَلْفَا سِنِه

وْقَلْبُو وَلا مَرَّه قِسِي

ـ3ـ

خَبَّى بْقَلْبُو ضَيعتُو

وْوَزَّع عْلَيْنا مْحَبّتُو

وْبَعْدا بْدِينَيْنا كلمتُو:

يَمِّي.. الدَّمْعات احْبِسِي

ـ4ـ

اسْتَشْهَدْ.. تا يِفْدِي مَوْطنُو

وْضَيعْتُو الْـ عَمْ تِحْضِنُو

أَبْطالْنا هِنِّي الْـ بَنُوا

لِلْمَجْد أَكْبَر مَدْرَسِه

**

ملاك زغير: جفري

غنتها الأخت مارلين شديد في جنازة الطفل الملاك جفري أحد تلامذة معهد سيّدة لبنان.

ـ1ـ

جِفْري.. جِفْرِي مْلاكْ زْغِيرْ

طَيَّرْ عَ السَّما الزَّرْقَا

وْنِحْنَا اللِّي مِنْحِبُّو كْتِيرْ

وَلَّعْ بِقْلُوبْنا الْحَرْقَه

ـ 2ـ

ناطِرْ تا يْقَابِلْ يَسُوعْ

لأَوَّلْ مَرَّه بِالْقُرْبانْ

تْيابُو الْبَيْضَا وْضَوّ شْمُوعْ

رَحْ يِبْقُوا بْسَيّدِةْ لُبْنانْ

يِحْكُوا عَنْ ظُلْم الْفِرْقَه

ـ3ـ

أُمُّو وبَيُّو زِعْلانِينْ

لا تِتْرُكْ قَلْبُنْ مَقْهُورْ

وْأَهْل الدَّامُور حِزْنانِينْ

خَلِّي عَيْنَكْ عَ الدَّامُورْ

وْأَرْض بْلادي الْمحْتِرْقَه

**

آدمي: رامز متري

إلى روح الفقيد رامز متري، أردة، لبنان، 2004

ـ1ـ

آدَمِي.. شُو آدَمِي

بْيِنْقَالْ عَنُّو بَسّ

إِسْمُو رَمْز

مِتْل الأَرْز

بَكَّى عْيُون الشَّمْس

لِمِّنْ تِكِي..

يا بِِنْت عَمِّي شُو بِكِي

شِرْبِتْ دْمُوعِكْ مَحْرَمِه

وْمَقْطُوعْ فِيكي الْحِسّ؟

ـ2ـ

رُوحُوا اسْأَلُوا غَيْرِي

عَنْ رَامِز الْمِتْرِي

رُوحُوا اسْأَلُوا أَرْدِه

وْحَرفْها الزَّهْرِي

بِيخَبّرُوا أَخْبَارْ

بِتْفَرِّح الْوَرْدِه

وْبِتْسَوْسِح الأَطْيارْ

رَبَّى وْلادُو عَ الصّلا

تا الْبَيْت بِالْعِطْر انْتَلا

وْكلّ ما يْقِلِّي: يا هَلا

إِتْحَمَّمْ بْعِطْري

وْصِيرْ.. وِالْمَوْسِمْ غَلا

يِرْخَصْ إِلُو عُمْرِي

ـ3ـ

يا ما حِكِي الْهُجْرانْ

وْفِنْزْوِيلاَّ.. كِيفْ

شَكّ الْهَجرْ أَوْطانْ

مُشْ لازِمَا تِعْريفْ

وْكِل ما الْتَقَى بْجُوعانْ

يِعْجُنْ حَنانُو رْغِيفْ

يا رَامزْ الإِنْسانْ

يِرْحَم تْرَابَكْ

بْإِسْمَكْ حلفْ لُبْنانْ

وْغَصّ عَ غْيابَكْ

**

مين زعّلَك؟: هشام كامل المرّ

إلى روح الشاب هشام كامل المرّ

ـ1ـ

مُشّ حَقّ بِـ أَوّل رَبيعُو يْمُوتْ

طَيْر أَبْيَض طَيّرُوا جْناحُو

وِالدّمْع يِتْدَحْرَج عَ حَبْل سْكُوتْ

مَجْدُولْ بِجْرَاحُو

وِالْحُزن يِسْتَوْطِنْ قَراني بْيُوتْ

سُكَّانْها راحُوا

ارْتاح الْبِكي

عَ خْدُودُنْ الْـ عَمْ تِشْتِكِي

وْبَعْد ما ارْتاحُوا

بْدِنْيِةْ وَجَعْ سَاحُوا!

ـ2ـ

مِينْ زَعَّلَكْ

تَا تْغِيبْ، وِالسَّاحَه إِلَكْ؟

يا بَدْر هاك الدَّارْ

صَار الْحُزن زِنَّارْ

بِيلِفّ الْفَلَكْ

وْتاج الْمُلكْ مِنْهارْ

عَ غْيَاب الْمَلَكْ

يا مَلَكْ بَيْت الْمُرّ ما أَجْمَلَكْ!!

ـ3ـ

وْأُمَّك الْـ صَرْلا سْنِينْ

تْرَبِّيك بِصْلاواتْها

وِتْدَلِّلَكْ

تِسْقِيكْ مِنْ دَمْعاتْها

وْتِهْتُفْ إِلَكْ:

(رَبّ السَّما يِحْمِيكْ

تِكْبَرْ.. وْإِفْرَحْ فِيكْ)

شُو بَدَّلَكْ؟

تا تِهْجُر الْحُضْن اللِّي صَفَّى مَنْزلَكْ

يا هِشَام الْمُرّ

صَعْب الْفراق ومُرّ

عَ أُمّ..لِـمْ بِتْطِلّ

بْتِفْرُش طَرِيقَك فُلّ

وْبِينِطّ قَلْبَا مْنِ الصَّدْر يِسْتَقْبِلَكْ

ـ4ـ

وْبَيَّك.. اللِّي بَاعْ عُمْرو وِاشْتَراكْ

تا يْعِيشْ باقِي الْعُمْر يِتْفَيَّا بْدَراكْ

عَ بُو هِشَام قْسِيتْ

هَـ الْـ تَحْت جِنْحُو رْبِيتْ

وْصِرت الْحُلم بِالْبالْ

شُو غَيَّر الأَحْوالْ؟

مِنْ دُونْ وِداعْ مْشِيت!

نَطْرَك ليالي طْوالْ

وْلِمِّنْ إِنتْ ما جِيتْ

وَدَّى فَرَحْ هَـ الْعُمْر تا يِمْشِي وَرَاكْ

وَدَّى سَهَرْ عِينَيْهْ تا يِسْهَرْ مَعَكْ

وْنَخّ صَوْب الأَرْض تا يْبَوِّس ثَراكْ

وْكِلْمِة (بْحِبَّكْ) يِزْرَعا بِـ مَسْمَعَكْ

ـ5ـ

طَلّ خالَكْ.. طِلّ قِلْلّو: مَرْحَبَا

غْبار السَّفَرْ بَعْدُو مْكَبَّش بِالْعَبَا

تارِكْ وَطَنْ تا يْشُوفْ وِجَّكْ يا هِشَامْ

كِلْمِةْ (يا أَهْلا).. قُولْها.. لا تِحْجِبَا

كِلّ عُمْرَكْ كِنْت تِتْحِفْنا بْكَلامْ

بْضِحْكاتْ، غُرْبِة قَهْرنا بِتْرَطِّبَا

أَحْلى خَطِيبِه هَوْنْ مَعْ غادَه وْوِسامْ

(ويسُو) وَحِيدْ.. وْوِحْدتُو ما أَصْعَبَا

وِعْمامَكْ حْوالَيْك بِيلِفُّنْ ظَلامْ

وْدَمْعاتْ كِلّ حْبايْبَكْ أَنَّاتْ

وْعَ شْفافُن الصَّرْخاتْ: ضيعانْ الصِّبَا

**

شعلة نار: داني فريد الترس

إلى روح الشهيد داني فريد الترس

ـ1ـ

عُمْرَكْ قِدَّمْتُو هْدِيِّه

لأَرْزِةْ لُبْنانْ

رِحْتْ.. وْرَحْ تِبْقَى هِيِّي

تْحاكي الأَزْمانْ

وِتْخَبِّرْهُنْ خَبْرِيِّه

عَنْ دانِي الْـ كانْ

شِعْلِةْ نار وْحِنِّيِّه

وْمَنبَعْ إيمانْ

ـ2ـ

حْلِفْت بْتُرْبِةْ أَجْدادَكْ

بِتْرِدّ النَّحْسْ

عَنْ شَعْبَكْ بِاسْتِشْهادَكْ

يا داني التِّرْسْ

نْطَرْنا يْشَعْشِعْ فُؤادَكْ

وْنِعْمِلَّكْ عِرْسْ

قِمْت تْزِوَّجْت بْلادَكْ

عِنْد الدَّيَّانْ

ـ3ـ

يا شهيد الرُّجُولِه

يا أَحْلى شَبّ

خْسِرْناكْ.. وْمُشْ مَعْقُولِه

نِخْسَرْ هَـ الْحَرْبْ

قِرَّرْت مْنِ الطُّفُولِه

تِمْشِي هَـ الدَّرْبْ

وْتِشْرَحْ مَعْنَى الْبُطُولِه

لْمُطْلَقْ إِنْسانْ

ـ4ـ

مُشْ رَحْ نِزْعَلْ لِغْيَابَكْ

أَوْ نِسْكُبْ دَمْعْ

وْإِنْت الفَخْر لأَحْبَابَكْ

وِلْباقي الْجَمْعْ

الْمَجْد زْرَعْتُو عَ بابَكْ

فِجَّرْت اللَّمْعْ

لِمِّنْ قِدَّمْت شْبَابَكْ

كِرْمالْ لُبنانْ

ـ5ـ

أَوَّلْ جَيْشِي بْضَيْعِتْنا

ضَحَّى بِالدَّمْ

هَايْ عُرْبُون مْحَبِّتْنا

لَـ أَحْلَى أُمّ

وْتا نِدْعَسْ عَ مْصِيبِتْنا

وِالدَّمْع نْلِمّ

مْنِتْذَكَّرْ شَبيبِتْنا

الْـ فِدْيِتْ لُبْنانْ

ـ6ـ

وْمِجِدْلَيَّا الْمِنْصَانِه

مْنِ عْيُون الشَّرّ

ضَحِّتْ بإِبْنا داني

الْـ أَغْلى مْن الدّرّ

يا مِسْتَوْطِي حِيطاني

أُوعى تِنْغَرّ

عِنّا الْجَيْش اللُّبْناني

أَقْوَى مْن الْجانْ

**

حبيب الكل: حنّا لويس بعيني

إلى روح الوالد حنّا لويس بعيني

ـ1ـ

يا حَبِيب الْكلّ شو بْقِلَّكْ؟

أيّوب ما داق الْوَجَعْ مِتْلَكْ

كانْ عِنْدَكْ قَلْب يِتْدَلَّع عْلَيْكْ

وْتِصْرُخْ: يا قَلْبِي فِيقْ مِنْ جِهْلَكْ

وْمَرْتَكْ الْـ رَكْعِتْ تَحتْ إِجْرَيْكْ

تِخدْمَكْ.. تَا تْصِحّ عَ مَهْلَكْ

ما صَدَّقِتْ وَقْت انْطَفُوا عِينَيْكْ

إِنَّكْ يا حَنَّا رَح بْتِقْسَى كْتِيرْ

عَ عَيلْتَكْ.. عَ صْحابَك وْأَهْلَكْ

ـ2ـ

لمِّنْ عِرِفْ جُوزافْ هَـ الإِبْن الْوَحيدْ

يَللِّي شِفي أَمْراضْ كانِتْ عَم تْزيدْ

عَافْ لِنْدُنْ.. قالْ: لِنْدُن مُشْ إِلِي

وْبَيِّي حَبيبي ماتْ مِنْ قَلْبُو الْعَنِيدْ

وْصَفَّى بْصَدْرو الْحُزْن عَمْ يِغْلِي غَلِي

وْيِتْطَلَّع بْمَدْلِينْ، وْيِقِلْلاّ: سْأَلِي

أَللَّـه عْلَيْنا لَيْش عَامِلْ مَرْجَلِه

وْكِنْتِي، يا أُخْتِي، ساعِة اللِّي ماتْ

بْعِيدِه.. مِتلْ ما كِنْت، يا حَسْرَه، بْعِيدْ

ـ3ـ

ومِجْدْلَيَّا الْـ كِلّ عُمْرا مَفْخَرَه

للنّاسْ.. هَـ الْـ عِنْدُنْ شَهامِه وْمَقْدَرَه

الدّمعاتْ غَطُّوا مْروجْ عِينَيْها

وِغْصُونْها بْريح الْحُزنْ مِتْكَسَّرَه

وْصَفَّى الْقَدَرْ يِتْمَرْجَل عْلَيْها

وْيِحْصُدْ شَبابا.. وْبَعدْها مِتْصَبَّرَه

يا عَمّ حَنّا.. بْفَيْها وِبْمَيّها

بْحَلّفَكْ.. وَصِّلْ سَلامي لِلْحَبيبْ

سَرْكيسْ بَيِّي.. جَارَك بْهَـ الْمَقْبَرَه

**

حبيبة قلبنا: سوسان كرم

إلى روح الأم سوسان كرم

ـ1ـ

يا حَبِيبِة قَلْبنا.. شُو صَابْنَا

حَتَّى السَّوادْ نْعَلّقُو عَ بْوابْنا؟

وْإِيَّامْنا تْعَبِّي ظُلمْ.. تِرْخِي ظُلمْ

وْمِتل الْحَرامِي تِسْرُق مْن صْحابْنا

نِحْنا الْمُمَثِّلْ.. وِالْعُمْر قِصِّةْ فِلمْ

وْكِلْمِةْ نِهايِه مْدَوّنِه بِكْتابْنا

سُوسانْ.. يِمْكِنْ بَعْد ما عِنْدِك عِلمْ

بْصَرْخِةْ رُومانُوسْ: وَدّعُولِي حْبابْنا

بْصَرْخِة طْفال زْغارْ.. شافُوكي حُلمْ

نِحْنا بْغُرْبِه.. لا تْزِيدِي عْذَابْنا

ـ2ـ

يا أُمّ.. سِقْيِتْ مِنْ دُموع عْيُونْها

أَطْفالْ.. رِبْيُوا عَ الشَّهامِه وِالشَّمَمْ

الأَرْزِه.. إِذَا بِتْبَاسْ نِحْنا بْدُونْهَا

مِنْصِيرْ ما عِنَّا شِعار وْلا عَلَمْ

يا أَرْزِة الْـ مِن مِجْدَلَيَّا غْصُونْها

مُشْ حَقّ بِـ هَـ الأَرْض يِطْوِيكِي الْعَدَمْ

وْمُشْ حَقّ هَـ الْعَيْلِه يْجِنّ جْنُونْها

وْيِنْحِنِي لِلأَرْض رُومانُوسْ كَرَمْ

ـ3ـ

وَدّعُوها.. وَدّعُوا هَـ السَّوْسَنِه

أُمّ الْعِيال الْـ بِالطَّهارَه مْزَيّنِه

هَـ الْـ كانِت الضِّحْكِه عَلَى شْفافا قَمَرْ

هَـ الْـ زَيَّنِتْ بِمْحَبِّتا الْعَيْش الْهَنِي

وْلَوْلا الدَّمعْ بِيرِدّ أَمْواتْ الْبَشَرْ

كِنْت عْمِلتْ طُوفانْ بِدْمُوع الْعُيُونْ

تا رَجّعِكْ إِنْتِي وْبَيِّي لْـ هَـ الدِّنِي

**

عمر الزّهرة: إِيلي جون شعنين

إلى روح الطفل الْمَلاك إِيلي جون شعنين، 5/1/1995

عمرك عمر الزَّهْرَه .. وْصار

عمرك عمر القدِّيسين

برسا زَيِّنْتَكْ بِقْمَارْ

الورد .. وْبِزْهُور النّسرين

وعَ غْيَابَك كل الأطيار

بِكْيِتْ بِكْرُوم رِشْدِبّين

يا شبّ .. الْـ عقلك ختيار

يا ضحكه.. رَكْعِتْلا سْنِينْ

الأم الْمِكويِّه بالنّار

شْموع عْيُونا مطفيين

والْبَيّْ الْـ سَمَّاكْ نْهَار

مين متلو بْهَـ الْوَقْعَه مين؟

تا نِبْكي وِنْفَضّي جْرارْ

الدَّمعَه بِتْصَفّي سِكِّينْ

حاملها الحزن الْغَدّارْ

تا يْفَزِّعْ فيها مْساكين

مُش رح نبكي .. كبارْ زْغار

إنت بعينَيْنا عَ طول

باقي يا "إِيلي شَعنينْ"

**

جرجورة: جرجورة اليمّوني

إلى روح الفقيد جرجورة اليمّوني

ـ1ـ

أَيَّا شِعْر بِيوَدِّعَكْ.. قِللِّي؟

أَيَّا كَلام بْيِعْجِبَكْ؟

تَا إِمْدَحَكْ.. مُشْ مُمْكِنْ تْخَلِّي

شَاعِرْ بِشِعْرُو يْعَذِّبَكْ

يَا مْلاكْ بَيْن النَّاسْ مِتْجَلِّي

رَبّ السَّمَا عَمْ يِطْلِبَك

رَحْ شَهِّد بْبَرْسَا أَلِفْ مِلِّه

وْخَلِّي الْخَلِيقَه تْطَوِّبَكْ

ـ2ـ

حْبَال الْمَسَافِه الْـ بَيْنَك وْبَيْنِي

رَحْ تِشْنُق ضْلُوعِي

لا تْقُولْ سَاكِتْ شَرْبِل بْعَيْنِي

الصَّرْخَاتْ بِدْمُوعِي

يَا كْفُوفْ زَرْعِتْ أَجْمَل جْنَيْنِه

مَعْ بِنْت عَمِّتْنَا

شْبَابْ وْصَبِيِّه.. يَا مَلاَ عَيْنِي

زِينِه بْغُرْبِتْنَا

ـ3ـ

يَا الْـ كِنْت خَايِفْ عَ الْوَطَنْ

وِمْسَيّجُو بْحُبَّكْ

جَيْشَكْ بِلَيْلات الْمِحَنْ

حَامِي حِمَى شَعْبَكْ

تَا يْرِدّ غَدْرَات الزَّمَنْ

عَنْ أَرْض حَرْقِتْهَا الْفِتَنْ

وِفْدِيتْهَا بْقَلْبَكْ

ـ4ـ

جِمَّعْت بَاقَاتْ الزَّهْرْ

تَا حَيِّك أْكالِيلْ

تْلَوِّن سْوَاد الْقَبْرْ

تْحَوِّل تْرَابُو تِبْرْ

تَا يْلِيقْ بِالْوِجّ الْجَمِيلْ

بِعْيُونْ جَرْجُورَه

بْدَعْسِةْ جْرَيْن الْبَطَلْ

وْغَسِّل بْدَمْعِي زَعَلْ

بَرْسَا.. الْـ بِالْكُورَه

**

موتك يا بو خطّار: مخائيل أبي خطّار

إلى روح الفقيد مخائيل أبي خطّار

كْبِيرِه.. وْبِـ عَيْنِي كْتِيرْ إِنْتِي زْغَيَّرَه

يَا كَايْنِه.. يَا خَايْنِه.. يَا مْعَتَّرَه

يَا فَانْيِه.. يَا مْشَنْطَلِه أَصْحَابْنَا

يَا سَارْقَه بَهْجِةْ قُلُوب مْزَهَّرَه

بْيِكْفِي الْوَطَنْ حَارِقْ سَمَا أَعْصَابْنَا

بْيِكْفِي الْعُيُون مْشَرّدِه وِمْطَيْشَرَه

بْيِكْفِي الزَّعَامِه دَاعْسِه عَ رْقَابْنَا

وْبِبْلادْنَا مَرْفُوعْ سَيْف الْمَجْزَرَه

لَيْش حَتَّى تْعَذّبِي غِيَّابْنَا

وْيِنْهَدّ بَعْد الْعِزّ حَيْط الْقَنْطَرَه؟

مُشْ عَارْفِه.. بُوابُنْ عَ كِتْف بْوَابْنَا

وْنِسْيُوا الْجُدُود يْرَكّبُولُنْ سِكَّرَه؟

مُشْ عَارْفِه.. مْصَابُنْ عَ طُول مْصَابْنَا

وْدَمْعِةْ عُيُونُنْ بِالْقُلُوب مْقَطَّرَه؟

هَوْدِي جِيرَان الْعُمْر.. هَوْدِي حْبَابْنَا

وِبْمِجِدْلَيَّا دَوْم كَانُوا مَفْخَرَه

كْبِيرُن مْخَايِيلْ.. شَيْخ شْبَابْنَا

هَـ الأَرْزِة الْـ صَرْلاَ زَمَان مْهَجَّرَه

بْمَوْتُو.. مَا بَعْرِفْ بَسّ شُو اللِّي صَابْنَا

انْكَسْرِتْ جَوَانِحْ عَ الرِّيَاحْ مْكَبَّرَه

بْمَوْتُو.. اسْوَدّ الْحَرْف جُوَّا كْتَابْنَا

وْصِرْنَا نْعَبِّي بِالدُّمُوع الْمَحْبَرَه

مَوْتَكْ يَا بُو خِطَّارْ.. زَاد عْذَابْنَا

وْمِتْل الرِّيَاح، بْلا وَعِي، صِرْنَا سَوَا

نْحَوِّلْ طَرِيقْ الْبَيْتْ صَوْب الْمَقْبَرَه

**