ـ1ـ
أَيَّا شِعْر بِيوَدِّعَكْ.. قِللِّي؟
أَيَّا كَلام بْيِعْجِبَكْ؟
تَا إِمْدَحَكْ.. مُشْ مُمْكِنْ تْخَلِّي
شَاعِرْ بِشِعْرُو يْعَذِّبَكْ
يَا مْلاكْ بَيْن النَّاسْ مِتْجَلِّي
رَبّ السَّمَا عَمْ يِطْلِبَك
رَحْ شَهِّد بْبَرْسَا أَلِفْ مِلِّه
وْخَلِّي الْخَلِيقَه تْطَوِّبَكْ
ـ2ـ
حْبَال الْمَسَافِه الْـ بَيْنَك وْبَيْنِي
رَحْ تِشْنُق ضْلُوعِي
لا تْقُولْ سَاكِتْ شَرْبِل بْعَيْنِي
الصَّرْخَاتْ بِدْمُوعِي
يَا كْفُوفْ زَرْعِتْ أَجْمَل جْنَيْنِه
مَعْ بِنْت عَمِّتْنَا
شْبَابْ وْصَبِيِّه.. يَا مَلاَ عَيْنِي
زِينِه بْغُرْبِتْنَا
ـ3ـ
يَا الْـ كِنْت خَايِفْ عَ الْوَطَنْ
وِمْسَيّجُو بْحُبَّكْ
جَيْشَكْ بِلَيْلات الْمِحَنْ
حَامِي حِمَى شَعْبَكْ
تَا يْرِدّ غَدْرَات الزَّمَنْ
عَنْ أَرْض حَرْقِتْهَا الْفِتَنْ
وِفْدِيتْهَا بْقَلْبَكْ
ـ4ـ
جِمَّعْت بَاقَاتْ الزَّهْرْ
تَا حَيِّك أْكالِيلْ
تْلَوِّن سْوَاد الْقَبْرْ
تْحَوِّل تْرَابُو تِبْرْ
تَا يْلِيقْ بِالْوِجّ الْجَمِيلْ
بِعْيُونْ جَرْجُورَه
بْدَعْسِةْ جْرَيْن الْبَطَلْ
وْغَسِّل بْدَمْعِي زَعَلْ
بَرْسَا.. الْـ بِالْكُورَه
**
